Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Bu masalada sizlar aytayotganingiz — “o‘tmishi yaxshi emas ekan” — degan gap.
Lekin o‘tmishi qanday bo‘lishidan qat’i nazar, hukm har doim hozirgi holat bo‘yicha bo‘ladi.

O‘tmishda inson mushrik bo‘lishi ham mumkin. Sahobalarning o‘tmishiga qarasangiz, Umar (r.a.) mushrik bo‘lganlar. Agar o‘tmishga qaraydigan bo‘lsak, deyarli barcha odamlar “yomon” chiqib ketaveradi.

Demak: o‘tmish hech narsani hal qilmaydi.
Asosiysi – uning hozirgi holati.

Agar hozir u tavba qilgan bo‘lsa, gunohlaridan qaytgan bo‘lsa, isloh bo‘lgan bo‘lsa – sizlar uni taloq qildirishga haqli emassizlar.

Agar sizlar shunday desangiz –
– gunohkor bo‘lasizlar,
– bir musulmon ayolning baxtsiz bo‘lishiga sabab bo‘lasizlar,
– uning qalbini og‘ritasiz, qarg‘ishiga qolishingiz mumkin,
– bir oilani buzib, shaytonni xursand qilgan bo‘lasizlar.

Bu keliningizga ham, ikkinchi keliningizga ham shuni tushuntirish kerak:
Bu taqdir masalasi. Bu yomon yoki harom narsa emas. Sunnatga ko‘ra erkak to‘rttagacha ayolga uylanishi mumkin, faqat adolatni saqlasa, huquqlarini ado etsa.

Sizlarning vazifangiz — ularga adolat, huquqlar, sabr va hushyorlik haqida maslahat berish, tartib o‘rnatishda yordam berish.

Lekin faqat o‘tmishi uchun deb turib ayolni taloq qildirishni talab qilish — to‘g‘ri emas.

Vallohu a‘lam.