Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Juda tiniq va aniq savol bo‘pti, masha Alloh.

Birinci savolingizga javoban: nikohingiz sahih hisoblanadi. Chunki sizning valiyingiz rozilik bildirib, vakil sifatida imomga vakolat bergan, imom esa guvohlar va kuyov bilan birga, mahrni zikr qilib nikohni o‘qigan. Bu holda nikoh to‘g‘ri bo‘ladi, unga shariat nuqtayi nazaridan e’tiroz yo‘q.

Ikkinchi masalaga keladigan bo‘lsak: agar eringiz siz bilan halovat sahiha (yaqinlik) qilmasdan taloq bergan bo‘lsa, bu holda idda (kutish muddati) vojib bo‘lmaydi. Siz bevosita ajralgan hisoblanasiz. Ammo mahrning yarmi sizga berilishi kerak. Chunki siz bilan nikoh o‘qilgan, ammo hali birga yashalmagan. Shunga ko‘ra, mahrning yarmi – agar aniq miqdor aytilgan bo‘lsa – er tomonidan to‘lanishi lozim.

Bu birinchi taloq bilan siz u kishiga begona bo‘ldingiz. Keyin u kishi uch kun o‘tmasdan “Men seni qaytib oldim” desa ham, bu qaytish (ruju’) hisoblanmaydi. Chunki halovat bo‘lmagan va idda ham yo‘q. Shu sababli qayta nikoh o‘qilmay turib, er-xotinlikka qaytib bo‘lmaydi.

Demak, agar eringiz siz bilan yana yashamoqchi bo‘lsa, u holda yana yangi nikoh o‘qilishi kerak, yangi mahr belgilanishi kerak. Bu mahr ilgari aytilgan mehrga bog‘liq emas – u masala yakunlangan. Sizga u mahrning yarmi berilishi kerak edi. Endi yangi nikohda yangi mahr tayinlanadi.

Shuningdek, yangi nikoh uchun yana sizning valiyingiz rozilik bildirishi lozim. Valiyingiz yana boshqa birovga vakolat bersa ham bo‘ladi. Xullas, qanday qilib birinchi nikoh bo‘lgan bo‘lsa, ikkinchisi ham o‘sha tartibda o‘qilishi lozim.

Muhimi, bu nikoh sizning roziligingiz bilan bo‘lishi kerak. Siz rozilik bildirmasangiz, u odam “qaytib oldim” degani bilan nikoh tiklanmaydi.

“Qaytib oldim” deyishning o‘zi bilan nikoh qaytmaydi.

Wallāhu A‘lam.