Bismillah,
Alloh ta’ologa hamdlar, undan keyin payg’ambar bo’lmaydigan payg’ambarga, uning oilasi, sahobalari va to qiyomatgacha ularga yaxshilikda ergashganlarga salavot va salomlar bo’lsin.

Kishini birovlariga bergan qarzi bo‘lsa, zakot chiqarish vaqti kelganda, olingan qarzni ham qo‘shib zakot beradimi yoki faqat qo‘lidagi boridan beradimi? Bu masalada tafsilot bor.

Qarz olganlarning holatiga qaraladi. Agar qarz olgan kishilar uni qaytarishga qodir bo‘lsa, qarz xuddi o‘z qo‘lidagi mol kabi hisoblanadi va qo‘lidagi pullarga qo‘shib hisoblanadi. Masalan, bir kishining qo‘lida 10 ming puli bor va yana 2 mingni birovga qarz bergan. Agar u qarz olgan kishi uni to‘lay oladigan bo‘lsa, qarz bergan kishi uni o‘z hisobiga qo‘shib, zakot chiqaradi. Ya’ni, 10 mingga yana 2 mingni qo‘shib, zakot hisoblaydi.

Ammo savolda kelganidek, agar qarz olgan kishi uni qaytarishga qodir bo‘lmasa yoki doimiy kechiktirib yurgan bo‘lsa, unda hozircha bu qarzni hisoblash shart emas. Shuning uchun qo‘lidagi 10 mingdan zakot beradi, lekin qaytarib ololmayotgan 2 ming qarz uchun hozircha zakot berish shart emas.

Agar bu qarz keyinchalik qaytarilsa, o‘sha paytda bir yillik zakotini beradi. Masalan, kimdir ikki yoki uch yildan beri qarzni bermay yurgan bo‘lsa, uni qo‘liga olgan paytda 40dan bir qismini zakot qilib berib yuboradi va qolganini ishlatishi mumkin.

Shunga ko‘ra, hozircha qo‘liga olmagan qarzni hisoblash shart emas.

Vallohu a’lam.