Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Aslida, siz balog‘atga yetgan, roshid (aqlli va mustaqil) erkak kishisiz. Shariat jihatidan uylanish uchun hech kimning ruxsati shart emas, uylanishga haqqingiz bor. Hech kimga bildirmay nikoh o‘qitib olsangiz ham nikoh sahih bo‘ladi — bu jihatdan to‘sqinlik yo‘q.

Lekin bu ishni yashirincha qilish onangizni ranjitishi mumkin. Onalar farzandining to‘yi, baxtli kuni haqida orzu qiladi. Sizni katta qilgan, sizdan umidi bor. Agar siz yashirincha uylansangiz, bu onangizga og‘ir botadi. Shu sababli, imkon boricha onangizni rozi qilishga harakat qiling. Halol niyatda, ochiqchasiga, hurmat bilan gaplashib, tushuntiring.

Agar har qancha harakat qilsangiz ham onangiz rozi bo‘lmasa, sabr qilish — yaxshi yo‘l. Ammo agar chindan ham sabr qilishga kuchingiz yetmasa, va zinoga ketish xavfi bo‘lsa, u holda uylanishingiz joiz — hatto kerak ham bo‘ladi. Faqat bu ishni yaxshi niyat, ehtiyot va mas’uliyat bilan amalga oshiring. Shariat buni man qilmaydi.

Xulosa:
Yashirincha uylanish mumkin, ammo eng afzal yo‘l — onani rozi qilib, duo olgan holda barakali nikoh o‘qitishdir.

Vallohu a‘lam.