Bismillah, alhamdulillah, vassalotu vassalamu ‘ala rasulillahi va ba’d.
Alloh bu bobongizga rahmat qilsin. Albatta, hajji badal qilish mumkin, lekin bu amalning sharti — avvalo o‘zingiz farz hajni bajargan bo‘lishingiz kerak.

Agar siz o‘zingiz uchun Islom hajini — farz hajni — ado qilgan bo‘lsangiz, shundan keyin boshqalar nomidan haj qilishingiz joiz bo‘ladi.

Rasululloh sollallohu alayhi vasallam bir kishining: “Labbayka ‘an Shubrumah” — ya’ni “Shubrumah nomidan labbay” deb aytayotganini eshitib, so‘radilar:
“Kim u Shubrumah?”
U kishi: “Bu mening birodarim, men uning nomidan haj qilyapman”, dedi.
Rasululloh sollallohu alayhi vasallam: “Avvalo o‘zing haj qildingmi?” — deb so‘radilar.
U kishi: “Yo‘q”, deb javob berdi.
Shunda Rasululloh aytdilar: “Avval o‘zing haj qil, keyin Shubrumah nomidan qil.”

Demak, bu hadisdan ochiq-ravshan dalil bo‘ladiki, hajji badal qilayotgan odam avval o‘zi farz hajni bajargan bo‘lishi shart.

Agar siz haj qilgan bo‘lsangiz, undan keyin bobongiz nomidan hajji badal qilishingiz mumkin.
Vallohu a’lam.