Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Bu holatda farzandlar uch toifaga bo‘linadi:

1. Erkakning birinchi ayolidan bo‘lgan farzandlari

2. Ayolning birinchi eridan bo‘lgan farzandlari

3. Ularning hozirgi nikohidan tug‘ilgan farzandlar

Erkakning birinchi ayolidan bo‘lgan farzandlari bilan ayolning birinchi eridan bo‘lgan farzandlari bir-biriga nomahram hisoblanadi. Hatto ular bir-biri bilan nikohlanishlari ham joiz.

Masalan: erkakning birinchi ayolidan bo‘lgan o‘g‘li va ayolning birinchi eridan bo‘lgan qizi — bir-biriga to‘liq nomahram, ular o‘rtasida nikoh joiz.

Ammo hozirgi nikohdan tug‘ilgan farzandlar:

• erkakning avvalgi farzandlariga ota bir aka-uka / opa-singil bo‘ladi;

• ayolning avvalgi farzandlariga esa ona bir aka-uka / opa-singil bo‘ladi.

Shu sababli, hozirgi nikohdan tug‘ilgan farzandlar har ikkala tomonga ham mahram hisoblanadi. Ularning amaki, xola, tog‘a, ammalari ham shunga qarab belgilanadi.

Xulosa qilib aytganda:

• avvalgi nikohlardan bo‘lgan farzandlar — bir-biriga nomahram;

• hozirgi nikohdan tug‘ilgan farzandlar — har ikkala tomonga mahram bo‘ladi.

Allohu a‘lam.