Bismillah,
Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.
Bu kabi vaziyatlarda mayda detallar ko‘p: “u shunday dedi”, “bunday qildi”, “rasm qo‘ymabdi”, “yozibdi” va hokazo. Lekin biz hammamiz hayotda imtihondamiz. Bu imtihonda sabr qilishimiz, ko‘nglimizni keng qilishimiz lozim. Ayniqsa ayol kishiga telefon masalasida e’tiborni tortmaydigan darajada beparvo bo‘lish foyda keltiradi.
Agar eringiz telefon orqali gaplashayotgan bo‘lsa, siz unga muloyimlik bilan: “Bu holat meni xafa qilyapti, iltimos, ko‘proq menga e’tibor qarating”, deb ayting. E’tiboringizni eringizga jalb qilishga harakat qiling. U sizning oldingizda turgan bo‘lsa, siz bilan suhbatlashishi lozim.
Eri bilan munosabatda ayol mehrli bo‘lishi kerak. Lekin er uxlayotganida yoki g‘aflatda bo‘lganida, ayol telefonini olib titkilab, o‘ziga yoqmaydigan narsalarni ko‘rsa, bu holatni shayton ustalik bilan qildiradi. Keyin bu qalbga shubha soladi, urush-janjalga olib keladi.
Ayol telefonni qidirib, biror gumon uyg‘otsa, bu ishonchni yemiradi. Buning natijasi er bilan ayol orasida sovuqlik, rashk, g‘azab va ishonchsizlik paydo bo’ladi. Shuning uchun telefon masalasida ko‘proq sabrli, murosa qiluvchi bo‘ling.
Agar sizning navbatingizda kundoshingiz bilan yozishayotgan bo‘lsa, bu xiyonatga o‘xshagan holat bo‘ladi. Bu, shariatda, birovning haqi hisoblanadi. Rasululloh sollallohu alayhi vasallam aytganlar: “Kim birovning ovqatini olib yesa…” — bu degani birovning haqini o‘g‘irlagan bo‘ladi. Ayol kishining navbatida boshqa ayol bilan aloqa qilish — o‘sha ayolning haqini yeyish bilan barobar.
Alloh adolatli. Bugun bu ishdan lazzatlanayotgan kishi ertaga sharmandalik bilan yuzlashadi. Alloh bunday makrlarga yo‘l qo‘ymaydi. Bir kuni bahona chiqadi, foyda deb o‘ylagan narsa baloga aylanadi. Shuning uchun sizga ham, kundoshingizga ham, eng avvalo eringizga nasihat shuki: bu ishlar shariatga muvofiq emas.
Er bo‘lsa — ikki xotinga uylanganini sunnat deb bilgan bo‘lsa — adolatli bo‘lishi shart. Birovning haqini birovga bermasligi kerak. Birining ko‘nglini olish uchun ikkinchisini ranjitish, islomiy hikmatga to‘g‘ri kelmaydi. Qiziga shunday munosabatda bo‘lishsa, u rozimi? Albatta yo‘q.
Bu ishda har ikki taraf kechirimli, sabrli, va bir-birini tushunadigan bo‘lishi kerak. O‘zaro samimiylik muhim. Ayol erining uyiga kelganda unga tinchlik va huzur berishi kerak. Uyga kirgan zahoti telefon bilan emas, erining ko‘ngli bilan mashg‘ul bo‘lishi kerak.
Aks holda, er soviydi, boshqa bilan gaplashishga moyil bo‘lib qoladi. Bu ayol esa “mehr bermayapsiz” deb noliydi. Axir mehr pul yoki suv emaski, o‘lchab-o‘lchab berilsa! Ayol borini bergan bo‘lsa ham ba’zida yetmay qolgandek ko‘rinadi. Bu paytda barini yig‘ishtirib, tavakkul bilan Allohga topshirish kerak.
Hech kim birovning haqini yeb baxtli bo‘lolmaydi. Alloh taoloning sunnatlari o‘zgarmaydi.
وَلَا يَحِيقُ ٱلْمَكْرُ ٱلسَّيِّئُ إِلَّا بِأَهْلِهِۦ ۚ — Yomon makr esa, faqat o`z egasiga qaytadir.
Surat Fāṭir (35:43)
Kimki makr qilsa, o‘zi giriftor bo‘ladi. Shu sababli ayollar shaxsiy hayotlarida Allohni yodga olib, Qur’on o‘qib, ilim bilan shug‘ullanishsin. Agar erlari boshqa bilan gaplashayotgan bo‘lsa, ular Alloh bilan gaplashsinlar. Bu ularga haqiqiy tinchlik va baraka olib keladi.
Vallohu a’lam
