Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Sizlarning holatingizga qaraganda, ajralish allaqachon yuz bergan. Eringiz sizga “Yo‘qol! Otangni chaqir, olib ketsin!” deb aytgan, va otangiz kelib sizni olib ketgan. Bu — ajralish alomatidir.

Ustiga ustak, eringiz keyinchalik ajrashish qog‘oziga ham qo‘l qo‘ygan bo‘lsa, demak bu — taloq hisoblanadi. Shunday ekan, “javobimni bering” deb undan yana bir og‘iz so‘z kutishingizga hojat yo‘q.

Fiqhda qoida bor: Muomalotlar shakl bilan emas, ma’no bilan baholanadi. Ya’ni odam “taloq” degan so‘zni aytmasa ham, so‘z va xatti-harakatlari taloq ma’nosini anglatsa, taloq tushadi. Masalan: “Bor, sen endi mening xotinim emassan”, “Otang olib ketsin seni”, “Menga boshqa kerak emassan” degan gaplar — taloqni anglatadi.

Sizning holatingizda ham:

• Eringiz sizni haydab yuborgan,

• Otangiz kelib olib ketgan,

• Eringiz sizga tuhmat qilinishiga jim qarab turgan,

• So‘ngra ajrim qog‘oziga qo‘l qo‘ygan.

Bularning barchasi — taloq ro‘y berganini bildiradi. Shunday ekan, agar iddangiz (uch hayz muddati) ham tugagan bo‘lsa, siz to‘liq ajralgan hisoblanasiz.

Nasihat:
Erkaklar, agar ajrashish bo‘lsa, ayolni to‘g‘ri yo‘l bilan, hurmat bilan javobini berib yuboringlar. Ayolni javobsiz, noaniqlikda ushlab turish zulmdir. Alloh taolo Qur’onda marhamat qiladi:

فَإِمْسَاكٌۢ بِمَعْرُوفٍ أَوْ تَسْرِيحٌۢ بِإِحْسَـٰنٍۢ ۗ

“Ularni (ayollarni) yaxshilik bilan tutinglar yoki yaxshilik bilan ajratinglar.” (Baqara: 229)

Alloh hammamizga adolatli, halol va pok munosabat bilan yashashni nasib qilsin.
Vallāhu a‘lam.