Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Bu holatda hukm chiqarishdan ko‘ra, maslahat va tanlov huquqi sizning o‘z ixtiyoringizda. Agar siz “farzand ko‘rmaganligim sababli ajrashsam bo‘ladimi?” deb so‘rasangiz — ha, ajralish shar’an joiz, va buning uchun gunohkor bo‘lmaysiz.

Chunki shariatda nikohning asosiy maqsadlaridan biri — nasl qoldirish, farzand ko‘rishdir. Bu tabiiy ehtiyoj va asosiy huquq. Shunday ekan, sizda bu asosda ajralish haqida qaror chiqarishga to‘liq haqqingiz bor.

Ayni vaqtda, agar siz:
– “U yaxshi inson, sabr qilaman, farzandsiz ham yashayman” desangiz — bu ham shar’an maqbul va savobli yo‘l bo‘ladi.

Lekin eringiz to‘y oldidan bu muhim haqiqatni yashirgan bo‘lsa — bu ochiqdan-ochiq xiyonat hisoblanadi. Bu orqali u sizni hayotingizdagi eng muhim qaror — nikohga majburan noto‘g‘ri asosda undagan. Shuning uchun bu holatni kechirish yoki kechirmaslik — faqat sizning ixtiyoringizga bog‘liq.

Ayrim hadislarda “talog‘ini so‘ragan ayol jannat hidini hidlamaydi” degan tahdidli ogohlantirishlar kelgan, ammo bu holat ularga kirmaydi. Chunki bu — asosli sabab bilan ajrashish masalasidir.

Sizga maslahat:
– Yaxshi o‘ylab ko‘ring,
– Yaqinlaringiz (opa-singil, onangiz) bilan maslahat qiling,
– Agar sabr qilishda qiynalayotgan bo‘lsangiz, bu qarorni Alloh oldida ochiq va to‘g‘ri sabab bilan qabul qilishingiz mumkin.

Farzand – inson hayotining davomi. Shuning uchun qaroringizni jiddiylik bilan qabul qiling.

Vallohu a‘lam.