Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Erkakning o‘z ayolini uzoq masofadagi begona, nomahram muhitga yolg‘iz ishlash uchun yuborib qo‘yishi, o‘zi esa nafaqa bermay, oilaviy mas’uliyatni tashlab qo‘yishi — katta xato va erkaklik mas’uliyatiga zid holatdir.

Siz tilga olgan holat shariat mezonlarida zulm sifatida ko‘riladi. Chunki:

• Erning asosiy burchi — o‘z ayoli va bolalariga nafaqa berishdir;

• Ayol kishini begona yurtda yolg‘iz ishlashga majbur qilish, o‘zi esa boshqa ayol bilan yashab, unga nafaqa berib, birinchisiga beparvo bo‘lish — bu adolatsizlikdir.

Sizning huquqingiz:

Shariatga ko‘ra, agar:

• Er nafaqani tark qilgan bo‘lsa;

• Ayolini ikki yil davomida yolg‘iz tashlab qo‘ygan bo‘lsa;

• O‘zi boshqa nikohga kirib, adolat qilmayotgan bo‘lsa —

Ayol kishining taloq so‘rashga haqqi bor. Bu gunoh emas.

Men sizga: “Darhol ajrashing,” demayman. Faqat shariat asosida bu holatda taloq so‘rashga haqligingiz borligini bayon qilyapman. Bu holat sababsiz ajrashish emas, balki o‘z haqqingizni tiklashbo‘ladi.

Agar siz: “Men sabr qilaman, balki bir kun kelib o‘zgarar,” desangiz – bu sizning tanlovingiz. Ammo: “Men bu holatda yashay olmayman,” deb taloq so‘rasangiz – bu gunoh hisoblanmaydi.

Ogohlik:

 Ba’zan ba’zi erkaklar ikkinchi nikohni “sunnat” deb oqlashadi, ammo birinchi oiladagi farz – nafaqani, adolatni, mas’uliyatni tark qilishadi. Bu sunnatga emas, nafsga ergashish bo‘ladi.

Rasululloh ﷺ aytganlar:
“Sizlarning eng yaxshilaringiz — o‘z oilasiga eng yaxshisi bo‘lganlaringizdir.” (Tirmiziy, 3895)

Xulosa: Siz taloq so‘rash orqali haqqingizni himoya qilayotgan bo‘lasiz. Bu holatda siz gunohkor emassiz.

Vallāhu a‘lam.