Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Bu juda og‘ir holat. Hayotdagi eng qiyin narsalardan biri — yomon fe’lli odam bilan birga yashash. Bunday holatda huzur-halovat bo‘lmaydi. Arzimagan narsalarga jahl qiladi, so‘ng oylab gaplashmay yuradi. Bu esa farzandlar tarbiyasiga ham salbiy ta’sir ko‘rsatadi.

Ibodatga, xotirjamlikka, fikr va xayolga ham halal beradi. Namozda ham, uyquda ham, doim o‘sha odam bilan urishganday bo‘lib yuriladi. Bu esa ko‘ngilni siqadi, gunohga sabab bo‘ladi.

Agar sabr qilishga qudratingiz yetadigan bo‘lsa — sabr qiling. Ammo har kim sabrga bir xil bardosh bera olmaydi. Bunday hollarda, har tomonlama, ya’ni plus va minuslarini hisoblab ko‘rish kerak. Men sizning holatingizni to‘liq bilmaganim uchun aniq bir fatvo bera olmayman. Lekin maslahatim — bu masalada sizga yaqin, farosatli, dono odamlar bilan maslahat qiling.

Masalan:

• Plus tomonlari: uyingiz bor, eringiz baribir farzandlaringizga ota, nafaqa berib turibdi, ijtimoiy barqarorlik bor.

• Minus tomonlari: asabiylik, ruhiy siqilish, mehr-muhabbat yo‘qligi.

Agar ajrashsangiz, sizda farzandlar bilan yolg‘iz qolish, moddiy mas’uliyat ortishi mumkin. Ammo ruhiy yengillik bo‘lishi ham mumkin.

Shularni taroziga soling va qaysi og‘irroq bo‘lsa, shuni tanlang. Chunki bunday oila masalalarida hech kim sizning o‘rningizda hukm chiqara olmaydi. Eng to‘g‘ri qarorni siz o‘zingiz, maslahatlar bilan, iymon bilan, sabr bilan qilishingiz kerak.

Vallāhu a‘lam.