Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Savolingiz juda muhim. Agar ayol eridan taloq olmagan holda ajrashdim deb chiqib ketsa — bu ajrim shar’an amal qilmaydi. Chunki ayolning nikohi faqat er taloq bersa, yoki qozilik yo‘li bilan (xul‘ yoki fasx orqali) bekor qilinsa, o‘sha holda haqiqiy ajrim bo‘ladi.

Agar bu ayol na taloq olgan, na qozilik qarori bilan nikoh buzilgan bo‘lsa, u hanuz erining nikohida hisoblanadi. Shu holatda boshqa erkakka turmushga chiqsa — ochiq zinoga teng bo‘ladi. Bu juda katta gunohdir.

Alloh taolo ayol kishiga erining nikohi ostida turgan paytda boshqa erkakka tegishni tugul, unga sovchi yuborishni ham harom qilgan. Toki eri taloq bersin, ayol iddasini (kutish muddatini) ado etsin, shundan keyin xohlasa boshqa erkakka turmushga chiqadi.

Bugungi kunda, afsuski, ayrim ayollar Rossiya yoki boshqa mamlakatlarga borib, eri bor bo‘lsa ham boshqa erkakka “nikohlanib” yashab yuribdi. Bu — ochiq zinodan ham battar holat, chunki u nafaqat harom ish qilmoqda, balki uni halol deb o‘ylamoqda. Bu esa diniy jihatdan yanada og‘irroq jinoyatdir.

Alloh taolo bunday holatlardan bizni asrasin, jamiyatimizni isloh qilsin. Har bir mo‘min erkak va ayol bu kabi yomonliklarga qarshi amr bil ma‘ruf va nahyu anil munkar bilan harakat qilishi lozim.

Alloh taolo Qur’onda aytadi:

كُنتُمْ خَيْرَ أُمَّةٍ أُخْرِجَتْ لِلنَّاسِ تَأْمُرُونَ بِٱلْمَعْرُوفِ وَتَنْهَوْنَ عَنِ ٱلْمُنكَرِ وَتُؤْمِنُونَ بِٱللَّهِ ۗ 

“Sizlar insonlar orasida chiqqan eng yaxshi ummat bo‘ldingizlar — yaxshilikka buyurasizlar, yomonlikdan qaytarasizlar va Allohga iymon keltirasizlar.”
(Oli Imron, 110-oyat)

Shuning uchun, kimki bir og‘iz so‘z bilan bo‘lsa ham yomonlikni qaytarishga sababchi bo‘lsa, u katta ajr oladi.

Alloh barchamizni isloh qilsin, ayollarimizni va qizlarimizni din, hayo va iffat bilan bezasin.

Vallohu a‘lam.