Bismillah,

Alloh ta`ologa hamdu sanolar, undan keyin payg`ambar bo`lmaydigan payg`ambarga, uning oilasi, sahobalari va to qiyomat ularga yaxshilikda ergashganlarga salavot va salomlar bo`lsin.

O‘tgan majlislarimizda ham aytib o‘tdik, aksar ulamolarimiz “chorniy kassa” o’ynashni joiz deyishgan. Boshqa biron bir ma’siyat ishlari aralashmasa, aslida joiz. Masalan, jo‘ralar yoki hamkasblar yig‘ilib, haftada yoki bir oyda pul yig‘ib, berib, shu jarayonni takrorlashning zarari yo‘q.

Endi zakoti qanday beriladi, degan savolga kelsak: agar pulni shu vaqtga qadar berib kelib, hali olmagan bo‘lsa, bu qarzga berilgan hisoblanadi. Masalan, har oyda 1 000 dollardan 10 kishiga pul berildi, jami 10 000 dollar. Zakot berish vaqti kelib qoldi, ya’ni Ramazon keldi. O‘sha 10 000 dollarni, va agar qo’lida boshqa naqd puli bo’lsa, osha naqd pulini ham qo’shib zakot beradi.

Agar oldindan olib qo‘ygan bo‘lsa-chi?

Masalan: birinchi bo‘lib unga pul yig‘ib berishgan bo‘lsa, zakot berish kerak bo‘lgan vaqtda qo‘lida osha pul turgan bo‘lsa, zakot beradi. “Bu pullarni odamlardan olganman, buni qaytarishim kerak”, deb aytmaydi. Qo‘lida turgan pulga zakot beradi. Ammo pulni nimagadir ishlatib yuborgan bo‘lsa, zakot berish shart emas.

Vallohu a’lam.