Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Haqqatan ham Qur’onni yodlash juda ulug‘ amaldir, lekin undan ham muhimrog‘i — unga amal qilishdir. Bugungi kunda bizning eng katta ehtiyojimiz Qur’onning ruhini anglash, ma’nosini tushunish va unga muvofiq yashashdir.

Alloh taolo Qur’onni “yodlang” deb emas, “tadabbur qiling” — ya’ni fikr yuriting, anglang deb nozil qilgan. Qur’on — bu nur, bu ruh, bu hayot. Qur’on — hidoyat va rahmatdir. Ammo bu sifatlar faqat uni anglaganlar uchungina bo‘ladi.

Alloh taolo ahli kitoblar haqida aytgan:
“Ular faqatgina o‘qib o‘tirishadi, amalda esa yo‘q”, deb ularni tanqid qilgan. Demak, Qur’onni faqat tilovat qilish, lekin uning ma’nosidan bexabar bo‘lish — bu yetarli emas. Ibn Mas’ud (roziyallohu anhu) aytganlaridek:
“Qanchadan-qancha Qur’on o‘quvchilar bor, Qur’on ularni la’natlaydi.”

Nega? Chunki ular Qur’onda aytilgan zulmni qilayotgan bo‘lishi mumkin, lekin o‘qiyotgan oyatida o‘zini tanimaydi, anglamaydi. Shuning uchun, sizning qilayotgan harakatingiz to‘g‘ri — Qur’onni tushunish, unga amal qilishga harakat qilayotganingiz — bu eng ustun yo‘ldir.

Alloh taolo sizga sabr va baraka bersin. Agar siz Alloh uchun sodiq bo‘lsangiz, Rasululloh ﷺ aytganlaridek:
“Agar sen Alloh uchun sodiq bo‘lsang, Alloh ham sen uchun sodiq turadi.”
(“In tasduqillāha yasduqka”).
Alloh sizga to‘g‘ri qarorlar, to‘g‘ri insonlar va to‘g‘ri hayotni nasib qilsin.
Vallohu a‘lam.