Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Bu holat imtihondir. Mo‘min inson hayotda sinovlardan o‘tadi. Aynan mana shunday vaziyatlarda iymonning haqiqiy ta’mi seziladi. Chunki kim chin dindor bo‘lsa, ommaviy tashviqotsiz ham haqni izlaydi, ilmga chanqaydi, imkon qidiradi.

Qanchalik to‘sqinlik bo‘lsa, odamlar dinga shunchalik ko‘proq oshno bo‘lishni istaydi. Bu imtihon oldida mo‘min sabr qiladi, ehtiyotkor bo‘ladi va vaziyatga mos ravishda to‘g‘ri yo‘l tutadi.

Alloh taolo Qur’onda: “خذوا حذركم” – “Ehtiyot chorangizni ko‘ringlar” deb buyurgan. Demak, mo‘min kishi o‘zini ataylab xavfga tashlamasligi lozim. Sabablarni qilish – dinimizning o‘zi talab qiladigan ish.

Siz aytgan holatlardan xabardormiz. O‘zini, yaqinlarini xavf ostiga qo‘yishdan ehtiyot bo‘lish kerak. Agar diniy materiallar sababli og‘ir jazolar qo‘llanilishi aniq bo‘lsa, ilmdan foydalanishda ehtiyotkorlik zarur. Chunki ilm olish va uni ulashish faqat bitta usulga bog‘liq emas. Ilm olishning yo‘llari ko‘p, ehtiyotlik bilan harakat qilish kerak.

Maslahat:

Mo‘min inson asalari kabi bo‘lishi kerak: faqat foyda beradi, zarar yetkazmaydi. Agar zulmga duch kelsa — sabr qiladi. Alloh bularni ko‘rib turibdi, hech bir narsa jazosiz qolmaydi. Zulm qilgan odam baribir jazoga uchraydi — bu dunyoda ham, oxiratda ham. Zulm qilayotganlar o‘ylasin: “Nima uchun qilayapman bu ishni?” Allohning diniga to‘siq qo‘ygan odam baraka topmaydi.

Ammo bu og‘irliklar siz bilan bizga — oddiy musulmonlarga — sabr, hikmat va ehtiyotkorlik bilan yondashishni o‘rgatadi.

O‘zingizni halokatga tashlamang.
Foyda-zararni solishtiring.
Ilm olishdan, yaxshilik qilishdan to‘xtamang.
Ehtiyotingizni ko‘ring.
Allohga suyaning.

Alloh hammamizga sabr, sobitlik va hikmat ato qilsin. Zulm qilayotganlarga ham Alloh hidoyat bersin.

Vallohu a‘lam.