Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Agar ular ishga hech qanday sarmoya kiritmagan bo‘lsa, minusda bo‘lishsa va hozirda faqat sizning pulingiz aylanayotgan bo‘lsa, bunday holatda ular foydadan teng ulush olishga haqli emaslar. Chunki ular o‘rtaga hech nima qo‘shmayapti.

Lekin agar ular mehnat qilayotgan bo‘lsa — ya’ni sherik sifatida faol ishtirok etayotgan bo‘lsa, bunda o‘z mehnatiga yarasha foyda olishga haqli bo‘lishadi. Bu holatda siz sarmoya bilan, ular esa mehnat bilan sherik bo‘lib turgan bo‘lasiz.

Ammo agar ular na sarmoya qo‘shgan, na ishlayotgan bo‘lsa, faqat “biz sherikmiz” deyish bilan foydadan ulush olishni istashsa — bu noto‘g‘ri. Sizda ularga shart qo‘yish huquqi bor: “Sheriklikni davom ettirish uchun har birimiz bir xil miqdorda sarmoya qo‘shamiz. Aks holda sheriklikni tugatamiz.”

Agar siz qarindoshchilikni e’zozlab, “mayli, o‘rtamiz buzilmasin”, deb bag‘rikenglik qilayotgan bo‘lsangiz — bu o‘zingizning ixtiyoringiz, va Alloh huzurida buning ajri bor, in shaa Alloh.

Lekin huquqiy tomondan olayotgan foydalar adolatli bo‘lishi kerak. Chunki sheriklikda hissa ham, foyda ham adolat asosida taqsimlanadi. Aks holda, bu sizning haqlaringizdan voz kechganingiz hisoblanadi.

Xulosa:

• Agar ular mehnat qilayotgan bo‘lsa — ulushi halol.

• Agar faqat sizning pulingiz aylanayotgan bo‘lsa — teng foyda olish noto‘g‘ri.

• Siz ularga teng hissa qo‘shish yoki sheriklikdan chiqish shartini qo‘yishga haqlisiz.

• Bag‘rikenglik bilan davom ettirishni istasangiz — bu fazilat, lekin majburiyat emas.

• Vallāhu a‘lam.