Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Avvalo shuni aytish kerakki, insonning o‘zidagi kamchilikni tan olishi – bu juda katta ne’mat. Siz tilim bilan ozor berganman deb tan olayapsiz, bu — tuzalish sari qo‘yilgan katta qadam. Ko‘pincha inson aynan mana shu o‘zini tanimaslik sababli to‘g‘rilana olmaydi.

O‘zini tanigan inson esa tuzalishga yondashgan bo‘ladi. Agar foiz bilan aytadigan bo‘lsak, bu to‘g‘rilanishning 50 foiziga teng.

Endi bu muammoni tark etish yo‘li qanday?

1. Allohning ismlarini o‘rganish – Ayniqsa, Allohning “Al-Halim” (halim – yumshoq, muloyim) ismini, bu sifatning ma’nosini o‘rganing. Alloh qanchalik hilm bilan, sabr bilan bandalariga muomala qiladi – buni ko‘p o‘qish va o‘ylash foyda beradi. Odam o‘z ojizligini, Allohning buyukligini anglay boshlaydi.

2. Rasululloh ﷺ va salaf solihlarning siyratini o‘rganish – Ayniqsa Ummul Mu’mininlarning (mominlar onalari) hayotidan ilhom oling. Ular qanday sabrli, muloyim, halim bo‘lgan? Ularning erlariga bo‘lgan muomalasidan saboq oling.

Rasululloh ﷺ aytganlar:

“إنما الحِلمُ بالتَّحلُّم، وإنَّما العِلمُ بالتَّعلُّم، وإنَّما الصبرُ بالتَّصبر”
“Hilm (yumshoqlik) – mashq bilan, ilm – o‘rganish bilan, sabr – sabr qilishga harakat qilish bilan hosil bo‘ladi.”

Ya’ni odam bir kechada sabrli, muloyim bo‘lib qolmaydi. Bu tarbiya bilan, mashq bilan, niyat bilan hosil bo‘ladi.

3. Yaxshi muhit tanlash – Agar atrofingizda sizni “Gapdan qolma”, “Eringga javobini ber”, “Senga kim o‘zi o‘rnak?” kabi ruhsiz, og‘ir maslahatlar beradigan dugonalar bo‘lsa – ulardan uzoqlashing. Chunki ular sizni yaxshilikka emas, ajrim va adovatlarga yetaklaydi. Shaytonning ishini bajaruvchi odamlar bo‘lib qolishi mumkin.

4. Yaxshi suhbatdosh topish – Salih, dinli, muloyim ayollar bilan do‘st tutining. Ular bilan suhbat va muomala sizni ichki tinchlikka yetaklaydi.

Va nihoyat, siz yosh ekansiz. “Oila qilmay yashasammi?” degan fikrga men qo‘shilmayman. Oila – tabiiy ehtiyoj, turmush qurish – sunnat va ijtimoiy barqarorlikning asosi. Faqat bu safar sabrliroq, sinchkovroq va o‘zingizni ham tarbiyalab, yaxshi niyat bilan turmushga qadam qo‘ying. Sizda hali ko‘p imkoniyatlar bor.

Hayotida musibat va xatoliklar bo‘lgan, lekin undan saboq olib, keyinchalik go‘zal hayot qurib ketgan ayollar juda ko‘p. Siz ham ulardan biri bo‘lishingiz mumkin. Alloh sizga halovat, sabr va to‘g‘ri yo‘lni tanlashda tavfiq bersin.

Vallāhu a‘lam.