Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Yo‘q, bu ish noto‘g‘ri, shariatga ziddir. Namoz o‘qimaydigan, ayollari hijob o‘ramaydigan, to‘yida aroq bo‘ladigan, umuman, shariatsiz yashaydigan bir oilaga qiz berish — bu unga zulm qilishdir.

Alloh taolo Qur’onda aytgan:

“Tayyib (pokiza) ayollar toyyib erkaklar uchundir.”
Bu – axloqiy muvofiqlik tamoyili. Taqvoli, diniy tarbiyada ulg‘aygan bir qizni shariatga zid hayot kechirayotgan odamlarga berish – unga diniy va axloqiy tazyiq keltiradi.

Agar xolangiz:

“Faqat erga tegsin, qanday bo‘lsa ham farqi yo‘q,” deb qaror qilgan bo‘lsa, bu kalta fikrlikdir. Chunki bu faqat bugungi kunni o‘ylab, ertangi oqibatni hisobga olmaslikdir. Ertaga bu qiz qanday muhitga tushadi? Diniy e’tiqodini saqlab qola oladimi? Qaynonasi yoki eri unga hijob o‘rashga ruxsat beradimi? Namozini ado qila oladimi?

Ba’zida uylanmagan holda yurgani afzal bo‘ladigan holatlar bo‘ladi. Har qanday holatda ham “faqat erga tegsin” degan qarash noto‘g‘ridir.

Alloh taolo aytadi:

“Kim Allohdan taqvo qilsa, U unga chiqish yo‘lini ko‘rsatadi va unga kutilmagan joydan rizq beradi.”
(Talaq surasi, 2–3-oyatlar)

Shuning uchun eng to‘g‘ri yo‘l – taqvo, sabr va shoshmaslikdir. Ne’matga ma’siyat bilan yetib bo‘lmaydi. Allohga tavakkal qilish va Uning roziligiga zid bo‘lmagan yo‘l bilan ish tutish kerak.

Xulosa:

• Qizni dinni e’tiborga olmaydigan oilaga uzatish – katta xato.

• To‘yda harom narsalar (masalan, aroq) bo‘lsa – bu yana og‘irroq gunohdir.

• Taqvo qilinsa, Alloh taolo o‘zi halol va yaxshiroq yo‘l ochadi.

• Shoshmasdan, maslahat bilan, Alloh roziligi asosida qaror qilish lozim.

Vallohu A‘lam.