Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Bu masala haqida ulamolar orasida ikki xil qarash mavjud: ba’zilari “joiz”, ba’zilari esa “joiz emas” deb hisoblashadi. Biz esa bu masalada “joiz emas” degan ulamolar fatvosini afzal ko‘ramiz, va fatvoni shunga asoslab beramiz.

Imom Molik (rahimahulloh) bu amaliyotga qarshi chiqqanlar. U kishidan rivoyat qilingan: “Tan’imga borib kelib, ketma-ket Umra qilayotganlarni ko‘rib, savob olyapmanmi yoki aksincha gunoh qilyapmanmi — bilmayman,” deganlar. Sababi, afzal amal — Masjidul Haromda qolib, nafl namoz va tavofni ko‘paytirishdir.

Asl dalillar:

1. Rasululloh ﷺ Makkada yashab turgan paytlarida sahobalarga Tan’imga borib Umra qilishni buyurmaganlar.

2. Sahobalar ham bunday qilmaganlar, ketma-ket Umra qilish amaliyoti ulardan kelmagan.

3. Oysha onamizning voqeasi:

   • Rasululloh ﷺ Oysha onamiz hayz holatida Umra qilolmagani uchun ularga alohida ruxsat berganlar.

   • Akalari Abdurahmonni u kishini Tan’imga olib borishga yuborganlar, ammo unga o‘zi uchun Umra qil deb aytmaganlar.

   • Agar bu amal mustahab yoki afzal bo‘lganida, Rasululloh ﷺ Abdurahmon ibn Abu Bakrga ham buyurardilar.

Bu esa ushbu amal Rasululloh ﷺ sunnatiga zid emasmi, degan savolni uyg‘otadi. Shuning uchun ba’zi ulamolar bu amalni dalilsiz, bid’atga yaqin deb bilishgan.

Nima qilish kerak?

Umrani bir marta bajarganingizdan so‘ng:

• Masjidul Haromda qolib, ko‘proq nafl namozlar, tavof, Qur’on tilovati va zikr bilan band bo‘ling. Chunki bu joyda bir namoz boshqa joyda o‘qilgan 100 ming rakatga tengdir.

• Ustozingiz uchun doim duo qiling. Haqlariga duo — bu eng katta ehsondir.

Alloh taolo sizni ham, ustozingizni ham ajr-mukofot bilan siylasin, ilmingizga baraka bersin.

Vallohu A‘lam.