Bismillah,

Alloh ta’ologa hamdlar, undan keyin payg’ambar bo’lmaydigan payg’ambarga, uning oilasi, sahobalari va to qiyomatgacha ularga yaxshilikda ergashganlarga salavot va salomlar bo’lsin.

Burundan qon kelishi va ro’zani buzish masalasi

Burundan qon kelayotgan odam, qon ko‘p kelmasligi uchun boshini ko‘tarsa va ichiga qon ketganini sezsa, bu bilan inshaa Alloh ro‘zasi buzilmaydi. Chunki bu beixtiyor yuz beradi. U o‘z ixtiyori bilan yeyish yoki ichish emas, balki tasodifiy holat bo‘lgani uchun ro‘zasi ochilgan hisoblanmaydi. Shuningdek, 60 kun kafforat ro‘za tutib berishi ham shart emas.

60 kun kafforat ro‘za qachon farz bo‘ladi?

Agar kishi ataylab va hech qanday uzrsiz ro‘zasini ochgan bo‘lsa, o‘shanda bu masala ko‘tariladi. Ammo bu ham ixtilofli masala. Hadisda faqat ayoli bilan yaqinlik qilgan kishi haqida kelgan. Endi, shu holat yeyib yoki ichib qo‘ygan kishiga qiyos qilinadimi, yo‘qmi, bu borada ulamolar o‘rtasida ixtilof mavjud.

Ba’zi olimlarning fikricha, bu faqat ayoli bilan yaqinlik qilishga xos. Yeyib yoki ichib qo‘ygan odam esa, agar uzrsiz ro‘zani buzgan bo‘lsa, bir kunlik ro‘zani qazo qilib tutib beradi. Ammo u katta gunohga botgan bo‘ladi va tavba qilish kerak. Shunday holatda, 60 kun kafforat ro‘za tutib berish shart emas.

Boshqa ba’zi olimlarning fikricha, Ramazon oyining hurmatini oyoq osti qilish – xoh yaqinlik orqali, xoh yeyish va ichish orqali bo‘lsin – bir xil darajada og‘ir hisoblanadi. Shu sababli, har ikki holatda ham 60 kun kafforat ro‘za tutish kerak, deyishadi. Lekin eng to‘g‘ri qarash shuki, kafforat faqat Ramazon oyida ayoli bilan yaqinlik qilgan kishiga xos. U kishi qul ozod qilishi, bunga qodir bo‘lmasa 60 kun ro‘za tutishi yoki bunga ham qodir bo‘lmasa, 60 miskinni to‘ydirishi kerak.

Biroq savoldagi holatda, burundan beixtiyor qon ketganligi sababli ro‘za ochilgan hisoblanmaydi. Bu holatni unutib yeyib qo‘ygan kishiga qiyos qilish mumkin. Rasululloh sollallohu alayhi vasallam: “Kimki unutib biror narsa yeb yoki ichib qo‘ysa, Alloh uni oziqlantirdi va sug‘ordi,” deganlar. Xuddi shunday, bilmagan holda qon ichga ketib qolsa, bu ro‘zani buzmaydi va inson Ramazon ro‘zasini davom ettiradi.

Vallohu a’lam.